चोरमारामा गण्डकी प्रदेशस्तरीय अन्तर जिल्ला ब्याडमिन्टन प्रतियोगिता हुँदै, तयारी अन्तिम चरणमा

नवलपुर न्युज

२०८२ अषाढ १४, शनिबार प्रकाशित ( २ महिना अघि) ४१५ पाठक संख्या

चोरमारा ।  गण्डकी प्रदेशस्तरीय अन्तर जिल्ला ब्याडमिन्टन प्रतियोगिता यही असार १६ गतेदेखि १८ गतेसम्म मध्यविन्दु नगरपालिका–७ स्थित चोरमारा कभर्डहलमा आयोजना हुने भएको छ। प्रतियोगिता प्रदेश खेलकुद परिषद् गण्डकी, पोखराको आर्थिक सहयोग तथा प्रवर्द्धनमा आयोजना हुँदैछ।

प्रदेश खेलकुद परिषद्को वार्षिक कार्ययोजना अन्तर्गत सञ्चालन हुने प्रतियोगिता जिल्ला खेलकुद विकास समिति नवलपुरको संयोजन तथा नवलपुर जिल्ला ब्याडमिन्टन संघको आयोजनामा हुने भएको हो।

प्रतियोगितामा गण्डकी प्रदेशका ११ वटै जिल्ला — कास्की, गोरखा, तनहुँ, नवलपुर, पर्वत, बागलुङ, म्याग्दी, मनाङ, मुस्ताङ, लमजुङ र स्याङ्जाबाट छनोट भएका खेलाडीहरूको सहभागिता रहनेछ। प्रत्येक जिल्लाबाट जिल्ला खेलकुद विकास समिति तथा जिल्ला ब्याडमिन्टन संघमार्फत ३ जना पुरुष र ३ जना महिला खेलाडी छनोट गरिएका छन्।

प्रतियोगितामा पुरुष एकल, पुरुष युगल, महिला एकल र महिला युगल गरी चार विधामा प्रतिस्पर्धा गराइनेछ।

नवलपुर जिल्ला ब्याडमिन्टन संघका अध्यक्ष दिपेन्द्र ढकालले प्रतियोगिताका लागि आवश्यक तयारीहरू अन्तिम चरणमा पुगेको जानकारी दिनुभयो । उहाँका अनुसार सहभागी टिमहरूको दर्ता प्रक्रिया अन्तिम चरणमा रहेको छ भने व्यवस्थापन कार्यहरू पनि लगभग सम्पन्न भइसकेका छन्।

अध्यक्ष ढकालले चोरमारास्थित ब्याडमिन्टन कोर्टमा म्याट जडानका लागि आवश्यक सहयोग उपलब्ध गराएकोमा गण्डकी प्रदेश खेलकुद परिषद्का सदस्य–सचिव तथा कार्यक्रम संयोजक श्रीधर शर्मा र परिषद्लाई विशेष धन्यवाद दिनुभयो । उहाँले दुईवटा म्याट जडान भइसकेपछि खेलाडीहरूलाई सहज रूपमा खेल खेल्न सहयोग पुग्ने विश्वास व्यक्त गर्नुभयो।