देवचुली नगरपालिकाको सार्वजनिक सुनुवाइमा फोहर मैला व्यवस्थापनप्रति जनचासो

नवलपुर न्युज

२०८२ बैशाख २३, मंगलबार प्रकाशित (५ घण्टा अघि) ९६ पाठक संख्या

नवलपुर । देवचुली नगरपालिकाले आयोजना गरेको सार्वजनिक सुनुवाइ कार्यक्रममा सर्वसाधारणले नगरको समग्र विकाससँगै फोहर मैला व्यवस्थापनका विषयमा विशेष चासो व्यक्त गरेका छन् ।

जनप्रतिनिधि र सरोकारवालासामु खुला रूपमा आफ्ना जिज्ञासा र गुनासाहरू राख्ने क्रममा नागरिकहरूले नगरका अन्य महत्त्वपूर्ण क्षेत्रहरू – कृषि, सिँचाइ, शिक्षा, भौतिक पूर्वाधार र बाटो स्तरोन्नतिको विषयमा समेत प्रश्न उठाएका थिए ।

कार्यक्रममा सहभागी स्थानवासीहरूले नगर क्षेत्रमा दिनप्रतिदिन बढ्दो फोहर व्यवस्थापनको चुनौतीबारे आवाज उठाउँदै तत्काल समाधानकोलागि सुझाव दिएका छन् । देवचुली १६ का ख्याम बहादुर क्षेत्रीले प्रश्न गर्नु भयो,“सडक छेउ, बजार क्षेत्र र बस्तीमा अनियन्त्रित रूपमा फोहर जम्मा हुँदै गएको छ, यसको उचित व्यवस्थापन कहिले हुन्छ रु” नगरप्रमुख हरि प्रसाद न्यौपानेले फोहर मैला व्यवस्थापनप्रति नगरपालिका गम्भीर रूपमा लागिपरेको बताउनु भयो । “हामी नयाँ फोहर व्यवस्थापन केन्द्रको स्थायित्व र स्रोत साधन व्यवस्थापनमा काम गरिरहेका छौँ, जनसहभागितालाई समेत यसमा प्राथमिकता दिइनेछ”,नगरप्रमुख न्यौपानेले भन्नु भयो ।

त्यस्तै, उपप्रमुख पार्वता तिवारीले जनताका प्रश्नहरूलाई प्राथमिकतामा राखेर कार्य योजना बनाइने बताउनु भयो ।
उहाँले भन्नु भयो,“नगरवासीहरूको आवाजलाई सम्मान गर्दै योजनाबद्ध रूपमा कृषि, सिँचाइ, बाटो सुधार र शिक्षा क्षेत्रमा काम भइरहेको छ र अझ प्रभावकारी रूपमा अघि बढाइनेछ ।”

कार्यक्रममा स्थानीयले ग्रामीण क्षेत्रमा खेतीयोग्य जमिनमा सिँचाइ नपुगेको, विद्यालयमा गुणस्तरीय शिक्षा अभाव, तथा ग्रामीण सडकहरू अझै कच्ची रहेको विषयमा जिज्ञासा राखेका थिए । उनीहरूले नगरपालिकाले प्राथमिकता निर्धारण गर्दा जनचाहना र आवश्यकतालाई प्राथमिकतामा राख्नुपर्नेमा जोड दिएका थिए ।देवचुली नगरपालिकाको आयोजना तथा देवचुली मिडिया प्रालिको संयोजनमा देवचुली नगरपालिका १६ को वडा कार्यालय परिसरमा मङ्गलवार देवचुली नगरपालिकाको वडा नं। १६ र १७ को सार्वजनिक सुनुवाइ कार्यक्रम गरिएको हो । नगरपालिकाले साबिकका चार वटा गाविसलाई ४ क्षेत्र बनाएर प्रभावकारी सार्वजनिक सुनुवाइ गर्ने सिलसिलामा साबिकको रजहर गाविसको भूगोलमा पर्ने वडाका जनतासँग आर्थिक वर्ष २०८१र०८२ को विकास व्यवस्थापन तथा सेवा प्रवाहका सम्बन्धमा कार्यक्रम गरेको हो ।

कार्यक्रममा उठेका प्रश्नहरूको नगर प्रमुख हरिप्रसाद न्यौपाने,उपप्रमुख पार्वता तिवारी, प्रमुख प्रशासकीय अधिकृत दिवाकर पौडेल देवचुली १६ का वडा अध्यक्ष केशवराज गौतम, देवचुली १७ का वडा अध्यक्ष गणेश शर्मा चालिसे र शाखा प्रमुखहरूले जवाफ दिनुभएको थियो ।

त्यसै गरी देवचुली नगरपालिकाका प्रमुख प्रशासकीय अधिकृत दिवाकर पौडेलले कर्मचारी वाट सेवा प्रवाहमा हुने ढिलासुस्ती, बेवास्ता र अनियमितताका विषय भए सिधै आफूलाई सूचना गर्न आग्रह गर्नुभएको थियो ।
नगर प्रमुख न्यौपानेले सार्वजनिक सुनुवाइमार्फत जनताले प्रत्यक्ष रूपमा व्यक्त गरेका गुनासा, समस्या लगायतका प्रश्नले आगामी दिनमा आफूहरूलाई थप जिम्मेवार हुन प्रेरित गरेको बताउनुभयो । प्रमुख प्रशासकीय अधिकृत पौडेलले अझै तिन वटा भूगोलमा यस आर्थिक वर्षको सार्वजनिक सुनुवाइ गरी नगरपालिकाकै सार्वजनिक सुनुवाइ सम्पन्न गर्ने जानकारी दिनु भयो ।

देवचुली नगरपालिकाका नगरप्रमुख हरि प्रसाद न्यौपानेको अध्यक्षतामा भएको कार्यक्रममा नगर उप–प्रमुख पार्वता तिवारी, प्रमुख प्रशासकीय अधिकृत दिवाकार पौडेल, वडाध्यक्षहरू, वडा सदस्य र देवचुली नगरपालिकाका विभिन्न शाखा प्रमुख एवम् नगरपालिकाका कर्मचारी सहित स्थानीयहरूको सहभागिता रहेको थियो ।

कार्यक्रमको सहजीकरण पत्रकार विष्णु गौडेलले गर्नुभएको थियो । सार्वजनिक सुनुवाइ कार्यक्रमले नगर सरकार र जनताबिचको अन्तरसम्बन्ध अझ प्रगाढ बनाएको सहभागीहरूले बताएका छन् ।
“सुनुवाइ कार्यक्रमले आवाज राख्ने थलो दिएको छ,”स्थानीयले भने, “तर ती आवाज योजनामा परिणत भएर कार्यान्वयन भए मात्रै यसको सार्थकता हुनेछ।”