मध्यविन्दुमा नगर स्तरीय झम्टा गीत प्रतियोगिता आयोजना हुने

नवलपुर न्युज

२०८२ भाद्र १८, बुधबार प्रकाशित ( ९ महिना अघि) ८६४ पाठक संख्या

चोरमारा । मध्यविन्दु नगरपालिकाले थारु महिलाको महान पर्व जितियाको अवसरमा नगर स्तरीय झम्टा गीत प्रतियोगिता आयोजना गर्ने भएको छ । प्रतियोगिता आगामी भदौ २५ गते बुधबार बिहान १० बजे नगरपालिकाको सभाहलमा हुने छ।

गीतका शीर्षक “प्राकृतिक जीवनशैली, स्वस्थकर रैथाने खाना” र “खुसी नगरवासी, समृद्ध नगरको चाहाना” रहनेछ । प्रथम हुने समूहले १५ हजार रुपैयाँसहित प्रमाणपत्र, द्वितीयले १२ हजार, तृतीयले ९ हजार ५ सय र सान्त्वनामा ४ हजार रुपैयाँसहित प्रमाणपत्र प्राप्त गर्नेछन्।

नगरपालिकाले वडा कार्यालयमार्फत महिला समूह तथा आमा समूहलाई सहभागी गराउन आग्रह गरेको छ । साथै पुराना मौलिक संस्कृतिको संरक्षण हुने खालका गीत प्रस्तुत गर्न अनुरोध गरिएको उपप्रमुख पूर्णकला चौधरीले जानकारी दिनुभयो।