१० दिनको तालिमबाट विद्यार्थी दक्ष: वेभसाइट बनाउने सिपसहित उत्कृष्ट विद्यार्थीहरू पुरस्कृत  

नवलपुर न्युज

२०८२ अषाढ १२, बिहिबार प्रकाशित ( २ महिना अघि) २३४ पाठक संख्या

कावासोती । सामाजिक विकास कार्यालय नवलपुरको आयोजनामा तथा शिव नमुना मावि, कावासोती–२ को सहकार्यमा सञ्चालन गरिएको ‘आईटी बुट क्याम्प तथा जॉब फेयर कार्यक्रम’ अन्तर्गत १० दिनको आवासीय तालिम सफलतापूर्वक सम्पन्न भएको छ। तालिमबाट विद्यार्थीहरू वेभसाइट निर्माणमा दक्ष बनेका छन्।

असार २ गतेदेखि ११ गतेसम्म सञ्चालित तालिममा जिल्लाका चार नगरपालिका र चार गाउँपालिकाबाट ३६ जना विद्यार्थी सहभागी भएका थिए। सहभागीहरूमध्ये पाँच जना उत्कृष्ट विद्यार्थीलाई नगदसहित पुरस्कृत गरिएको छ।

गैँडाकोटको रत्न राज्य माविका सुमित चापागाईंले प्रथम हुँदै नगद १० हजार, सोही विद्यालयका अर्जुन सापकोटा द्वितीय हुँदै ८ हजार, देचउलीस्थित भीमसेन आदर्श माविकी दिया बराल तृतीय हुँदै ५ हजार, हुप्सेकोटको जनता माविका राजु राना र गैँडाकोटकै जनक नमुना माविका माधव नेपाल सान्त्वना हुँदै ३र३ हजार रुपैयाँ नगद पुरस्कार प्राप्त गरेका हुन्।

तालिममा सूचना प्रविधिका इन्जिनियर रिपेस अधिकारी, योगेश रायमाझी, केशव मैनाली र सनोज श्रेष्ठ प्रशिक्षकको रूपमा संलग्न थिए। वेभ डिभलपमेन्ट, साइबर सेक्युरिटी, जाभा स्किल, इन्टरनेट प्रयोगमा सावधानी, डिजिटल सुरक्षा र एप्लिकेसनका जोखिमबारे व्यावहारिक सिप प्रदान गरिएको थियो।

तालिममा सहभागी विद्यार्थीहरूले सिकेका सीपले भविष्यमा आईटी क्षेत्रमा अवसर खोज्न मद्दत पुग्ने प्रतिक्रिया दिएका छन्। सहभागीमध्ये सुमित चापागाईंले “१० दिनमै वेभसाइट बनाउन सक्ने सिप पाएँ, अब अरू संस्था तथा विद्यालयका साइट बनाउन तयार छु,” भनी खुशी व्यक्त गरे।

समापन कार्यक्रममा प्रमुख जिल्ला अधिकारी भविश्वर पाण्डे, वडा अध्यक्ष शिव पाण्डे, शिक्षा विकास तथा समन्वय इकाई नवलपुरका प्रमुख दीपेन्द्रराज श्रेष्ठ, समाजिक विकास मन्त्रालय गण्डकीका महाशाखा प्रमुख प्रकाश देवकोटा लगायतको उपस्थिति रहेको थियो। कार्यक्रममा सहभागी सबै विद्यार्थीलाई प्रमाणपत्र वितरण गरिएको थियो।

सामाजिक विकास कार्यालय नवलपुरका प्रमुख कृष्ण प्रसाद पौडेलका अनुसार, तालिम छोटो भए पनि प्रभावकारी भएको प्रतिक्रिया आएको छ। आगामी दिनमा मन्त्रालयसँग समन्वय गरेर थप एडभान्स तालिम सञ्चालनको तयारी गरिने जानकारी दिनुभयो ।