दुर्गम धौवादी डाँडा क्षेत्रमा विद्युत विस्तार

नवलपुर न्युज

२०८० चैत्र ५, सोमबार प्रकाशित (१ महिना अघि) ४१२ पाठक संख्या

नारायण शर्मा

पूर्वी नवलपरासी —विद्युत सवस्टेशन निर्माण सम्पन्न भएको डेढ वर्षपछि दुर्गम धौवादी डाँडामा राष्ट्रिय प्रशारण  लाइनको विद्युत पहिलो पटक बितरण गरिएको छ ।

बुलिंटार गाउँपालिका ४ बोझा पोखरीमा निर्माण सम्पन्न भएको सवस्टेशनमा राष्ट्रिय विद्युतीिकरणको बिजुली जोडिएपछि त्यसैसंगै रहेको धौवादी गाउँमा विद्युतीिकरण भएको हो ।

ती क्षेत्रमा यसअघि त्यहीँ उत्पादित स्थानीय लघुजलविद्युत आयोजनाको बिजुली बालिँदै आएको थियो । लघु जलविद्युतबाट उत्पादित बिजुली रातिमात्र बितरण हुन्थ्यो । अब कुटानी पिसानी र उद्योग खोल्न समेत सहयोग भएको छ,स्थानीय रणबहादुर गाहामगरले भने, विद्युत लाइन तानिएको करिब ४ वर्षपछि दुर्गम पहाडी भेगमा विद्युत पुगेपछि स्थानीय खुसी भएका छन् ।

हुप्सेकोट गाउँपालिकाकी अध्यक्ष लक्ष्मी पाण्डेले पहिलो पटक यहाँको ४, ५ र ६ नम्बर वडामा राष्ट्रिय प्रशारणको लाइन पुगेको सुनाइन् । उनले उज्याले हुप्सेकोट अभियान अन्तर्गत प्रदेश सरकारको १६ करोड लगानीमा पालिकाको दुर्गम सबै गाउँमा विद्युतीकरण गरिएको सुनाइन् ।

गाउँपालिकाले विद्युतीकरणलाई पहिलो प्राथामिकतामा राखेर काम गरेको उनले जानकारी दिइन् । सोमबार गाउँपालिका अध्यक्ष पाण्डले विद्युतीकरणको उद्धघाटन गरेकी हुन् ।

यहाको बोझा पोखरीमा निर्माण थालेको ८ वर्षपछि विद्युत सवस्टेशनको निर्माण कार्य सम्पन्न भएको हो । सुरु सम्झौतामा ३ वर्षमा काम सम्पन्न गर्ने सम्झौता भएपनि ठेकेदारको लापरवाहि र प्राधिकरणले चासो नदिएका कारण काममा ढिलाई भएको हो ।

राष्ट्रिय प्रशारणको लाइन जोडिएपछि दुर्गम बुलिंटार, हुप्सेकोट र बौदीकालिका करिब ९ हजार घरमा बिजुली पुगेको छ । अहिले विद्युतीकरण भएको स्थान धौवादी फलामखानी रहेको क्षेत्र पनि हो । विद्युतीकरण भएको क्षेत्रमा पक्की सडक संजाल निर्माणको काम कछुवा गतिमा अघि बढेको छ ।

कावासोती कुम्सोत धौवादी सडक निर्माणथालेको ३५ वर्ष भइसक्दा पनि सडक निर्माणको काम अझै छिचोलिएको छैन । त्यहा ०४५ सालबाट सडक निर्माणको काम सुरु भएको हो ।